Oxetivu xeneral
Conocer pa conservar y convivir col monte vivo.
Esta unidá didáctica busca acercar al alumnáu d’Educación Secundaria la importancia ecolóxica, cultural y social de los castañeos y ablaneos como sistemes agrícoles y forestales vivos. A traviés de conteníos, actividaes y recursos adaptaos, l’oxetivu ye que la xente mozo comprienda’l valor d’estos ecosistemes como abellugos de diversidá biolóxica, fontes de recursos caltenibles y patrimoniu compartíu.
Ponse énfasis especial nel conocimientu de la so historia, la so diversidá biolóxica, los beneficios que suponen y les bones práutiques necesaries p’asegurar la so conservación. Al conocer estos paisaxes y el so funcionamientu, foméntase’l compromisu personal y colectivu pa col so cuidáu, integrando’l respetu pola naturaleza col desendolcu rural caltenible y la participación activa dende la educación.
Oxetivos temáticos
Comprender l’orixe, evolución y espardimientu de los castañeos y ablaneos nel mundu, y la so rellación cola comunidá rural. Reflexonar tocante a como’l ser humanu influyó na configuración d’estos paisaxes y como, a la vez, estos ecosistemes moldiaron la hestoria, la economía y la cultura de munches rexones.
Descubrir por qué los castañeos y ablaneos son ecosistemes clave na llucha contra’l cambiu climáticu y na conservación de la diversidá biolóxica. Valorar el so papel como espacios culturales y económicos caltenibles, entender los servicios que desarrollen como ecosistemes y fomentar el respetu poles práutiques tradicionales asociaes al so usu responsable.
Esplorar la diversidá biolóxica qu’alluga nel monte, más allá de castañeos y ablaneos: flora, fauna, fungos, paisaxe… Saber qué productos se saquen de manera caltenible (fruta, madera, setes, miel) y cómo beneficia tanto al mediu ambiente como a la salú y bientar de les persones.
Meter gana al alumnáu pa qu’actúen a favor de la conservación a traviés d’aiciones concretes: visitar, observar, recuperar conocimientos, divulgar, participar. Proponer actividaes educatives y participatives qu’ayuden a decatase del valor d’estes viesques y dar puxu a la so defensa activa dende lo llocal, xenerando conciencia crítico y comprometío.
Les actividaes y exercicios que se proponen busquen fomentar la participación activa del alumnáu, conectar el conocimientu cola realidá del entornu y desarrollar el pensamientu críticu. A traviés del trabayu en grupu, la observación, la investigación y la creatividá, quierse espertar l’interés pola conservación y el respetu hacia’l monte vivo.