Les castañales y ablanales comparten espaciu con decenes d’especies de plantes, animales, fungos y microorganismos coles qu’establez rellaciones de distintos tipos, creando un ecosistema ricu y equilibráu.
Índiz
La castañal y el so ecosistema
Pa comunicase ente ellos, estos árboles producen unes sustancies químiques que se llamen taninos, que tienen un doble efeutu:
Tóxicu
Eviten que dalgunes plantes d'alredor absuerban elementos nutritivos y reducen el so crecimientu cerca de les castañales, evitando la competencia.
Beneficiosu
Ayuden a establecer rellaciones especiales de les castañales con otres especies cercanes
Evitan el crecimientu de fungos, bacteries y virus que puen causar enfermedaes.
Esto xenera refuxos de vida y “pontes naturales” o islles de diversidá que xunen los paisaxes y garanticen la sobrevivencia de bien d’especies
… Los taninos que producen les castañales sirven pa evitar que los coman?
Son secantes y amargos pa dalgunos animales herbívoros y provoquen estriñimientu a quien los consuma.
Especial mención merez la rellación de les castañales coles especies del xéneru Quercus (encines, coscoxes, carbayos o sufreres) xenerando paisaxes perprestosos.
Les ablanales y el so ecosistema
Les ablanales tán mui rellacionaes coles viesques de ribera, les llindes de los praos y tierres d’aprovechamientu d’hortalexes y fruta. Cumplen la función de pasadoriu ecolóxicu, que conecten a tola comunidá de seres vivos que viven nestos sitios preciosos y sirven de zona de pasu y espardimientu pa les especies xabaces que viven
Faciliten el movimientu d’animales, ayudando asina a caltener la diversidá xenética de les especies y a fortalecer los ecosistemes que los arrodien.
Los fungos: Una rellación especial y fundamental
Los fungos forman micorrices, una cooperación (simbiosis) colos árboles a traviés de les raíces, como castañales y ablanales, que-yos permiten absorber elementos nutricios y agua de manera más eficiente, y los fungos consiguen azucares de la planta dempués de la fotosíntesis.
Ayuden tamién nel reciclaxe d’elementos nutricios y arriquecimientu del suelu cuando descomponen la materia orgánico, favoreciendo la rexeneración de la viesca aportando nutrición al suelu y calteniendo n’equilibriu l’ecosistema.
Por estes coses y más, la Unión Europea, protexe estos tipos d’hábitat forestal a traviés de la Direutiva Hábitats (una normativa orientada al caltenimientu n’estáu curiosu de conservación d’especies y espacios naturales nel contestu de la UE), con ayudes económiques y proyeutos nuevos pa conservalos y dalos a conocer.
En Montes Vivos realícense aiciones coles persones propietaries de les esplotaciones aprovechando estes rellaciones naturales de castañales y ablanales col oxetivu de fomentar la diversidá biolóxica y el desarrollu y emprendimientu llocal.
